Dr Zeedel 2017

 

Mir pfyffen uff e Strich

Wenn Aine emool s Rysse het

und gärn ebbis erlääbe wett,

denn kan er zue so Maitli go,

wo me am Stroosserand gseht stoh.

Die Maitli dien en denn verwehne,

är het – geege Gäld – e scheene

Oobe und kai Rysse meh –

nur sott en dert sy Frau nit gseh.

Die Maitli fir e soone Gspass,

findsch z Basel an dr Wäbergass.

Die gehn dert amme als uff d Pirsch

und sueche sich e sone Hirsch,

wo si – wie gsait – verwehne kenne,

doch gwehnlig macht nur aini s Renne.

Die andre wärbe flyssig wyter,

doch wird das Wärbe langsam schyter.

Denn d Stadt zieht dert e Strich am Egge,

dä soll die Maitli jetz abschregge,

ass si nit in dr Räbgass stehn,

oder an Glaareblatz no gehn.

Trottoiramsle bruuchts dert nit,

wills dert jo scho z vyl Duube git.

Me ka jetz ruehig dur d Räbgass go,

wird bim Vorbygoh nit au no

zem e Sytesprung verlaitet,

will sich jetz derte nimm uusbraitet

s eltschte Gwärb uff unsrer Wält,

wo Männer Liebi schänggt fir Gäld.

Eb dä Strich het miesse sy?

Mr wisses nit – doch merggt me gly –

s horizontale Gwärb floriert

und d Maitli schaffe ungeniert

wyter aa, denn wenn e Maa

will Sex fir Stutz und Äggschen ha,

und fir e Sytesprung isch zwääg,

findet er bestimmt dr Wääg,

wenn er wiider s Rysse het,

in some Maiteli sy Bett!

Und d Moral vo dääre Gschicht:

„Die Katze lässt das Mausen nicht"!

No ebbis hän mer welle saage:

Wenn au d Moralaposchtel glaage,

goht an dr Fasnacht – mit vyl Gschpass –

dr Cortège als dur d Wäbergass.

D Ladäärne-Uusstellig uff em Minschterblatz und d Waage- und Reggwisyte-Uusstellig bi dr Kasärne sin vom Määntig znacht bis am Mittwuch demorge!

Deert und an de drey Verkaufsständ (CINS) in dr Stadt ka men au alli Zeedel und Schnitzelbängg, d Blaggedde und dr Rädäbäng kaufe.

Am Frytig und Samschtig, 10. und 11. Meerz 2017 isch Noochwuggswärbig vo dr 1. Lektion im Zält uff em Barfi.